بئله حياتا نيفرت ! عابباس باريز نه آيا باغلييام، نه گونه باغلی، نه يئردن راضييام، نه گؤيدن راضی، بختی قارا گلميش شوم بير اينسانام، کائينات هاميسی دوشمندير منه. گؤزومو زيلله رم گئجه لر آيا، قويارام درديمی آيلا اورتايا، درديمی سايديلار، گلمه دی سايا، اؤز سايسيز درديم ده حئيراندير منه. قاناديم يوخ اوچام آسيمانلارا، يول تاپام گؤيده کی کهکيشانلارا چاتسايدی اللری سؤز قانانلارا، دئيه ردی بخت ائويم زينداندير منه. نه باهار ايسته رم، نه چمن، نه گول، نه گول سئوداسييلا سئوينن بولبول، تيکانا چئوريلير گؤزومده سونبول، بو پيسليک بيلميرم هارداندير منه. خوش گونه حسرتم بو طالعيمدن، بيلميرم نه گوندن يارانميشام من، آلتميش ايل دونيادا فلاکت چکن، دئمزمی بدبختليک عونواندير منه؟! گؤزومون قان ياشی دئمه آرازدير، آراز بو قان ياشيم يانيندا آزدير، يوخسول اينسان کيمی بختيم ناسازدير، بو قارا بختيم ده چوخداندير منه. يالتاقليق ائتمه ديم، اولماديم ماللی، اؤپمه ديم ال، اولام جاهلی - جالال لی، درين فيکيرلريم، اوزون خياللی، فيکريم درينليکده عومماندير منه. هاچان کی عئشقيمين يانار اوجاغی، نور ايله دولدورار بو بور- بوجاغی، اولاندا مسکنيم داغ- داش قوجاغی، هر يئر بير رؤوضه يی ريضواندير منه. باريز، حيات يولو چوخوردور، چالا، بو يولون يولچوسو گره ک مرد اولا، مين ايل بوندان سونرا اولان ماجرا، سنه گيزليندير سه، عياندير منه.